हाम्रो बारेमा

भोजपुर जिल्ला सदरमुकामबाट पूर्व दिशामा ११ कोस (५२ किमीको सडक दुरी) दुरीमा अवस्थित ऐतिहासिक एवम शैक्षिक पृष्ठभूमि बोकेको अरुण गाउँपालिका वडा नं. ५ मा अवस्थित यस श्री विश्वप्रेमी माध्यमिक विद्यालयले आफ्नो स्थापना कालदेखि विभिन्न आरोह अवरोह पार गर्दै समयको माग बमोजिमका विभिन्न कार्यक्रमहरुका साथ भोजपुर जिल्लाको शैक्षिक जगतमा आफ्नो छुट्टै पहिचान कायम गर्न सफल भएको छ । ।

स्थानीय शिक्षाप्रेमीहरुको अग्रसरतामा तत्कालीन राणा शासनकालमा नै वि.सं. २००५ सालमा विश्वप्रेमी मिडिल स्कूलको नामबाट आफ्नो शैक्षिक यात्रा शुरु गरेको यस विद्यालयले २०२२ सालमा माध्यमिक तह, २०६८ सालमा उच्च माध्यमिक तह तथा २०७० सालदेखि नेपाल सरकारको नीति बमोजिम प्राविधिक शिक्षा धार अन्तर्गत प्रत्येक जिल्लामा एउटा प्राविधिक विद्यालय स्थापना गर्ने कार्यक्रम अन्तरगत भोजपुर जिल्लाकै एकमात्र प्राविधिक विद्यालयको रुपमा कक्षा ९-१२ मा कम्प्युटर इन्जिनियरिङ विषयको पठनपाठन गरी मध्यम स्तरीय जनशक्ति उत्पादन गर्दै आइरहेको छ ।